Breaking News
Home / செய்திகள் / பொது முடக்கமா? கலெக்டர்களுடன் ஆலோசிக்கும் முதல்வர்!

பொது முடக்கமா? கலெக்டர்களுடன் ஆலோசிக்கும் முதல்வர்!

மாவட்ட ஆட்சியர்களுடன் மீண்டும் ஆலோசனை நடத்துகிறார் முதல்வர் எடப்பாடி பழனிசாமி.

ஐந்து மாவட்டங்களுக்கு ஏற்கனெவே பொது முடக்கம் அறிவிக்கப்பட்டுள்ள நிலையில், முதலமைச்சர் எடப்பாடி பழனிசாமி அனைத்து மாவட்ட ஆட்சியர்களுடன் நாளை ஆலோசனை நடத்த உள்ளார்.

கொரோனா பரவல் வேகம் அதிகரித்துள்ள நிலையில் சென்னை, காஞ்சிபுரம், செங்கல்பட்டு, திருவள்ளூர் மாவட்டங்களில் மீண்டும் பொது முடக்க உத்தரவு பிறப்பிக்கப்பட்டுள்ளது. இந்நிலையில் இந்த மாவட்டங்களில் மட்டுமல்லாமல் மாநிலத்தின் பிற பகுதிகளிலும் வைரஸ் தொற்று வேகமாக பரவி வரும் நிலையில் அங்கும் பொது முடக்க உத்தரவு அமலுக்கு வரும் சூழல் உருவாகியுள்ளது.

மதுரையில் கொரோனா பரவல் வேகத்தைத் தடுக்க, இன்று முதல் பொது முடக்கம் அமல்படுத்தப்பட்டுள்ளது. ஜுன் 30ஆம் தேதி வரை அமலில் இருக்கும் இந்த ஊரடங்கில் மதுரை மாநகராட்சி எல்லைக்குட்பட்ட பகுதிகள், பறவை டவுன் பஞ்சாயத்து, மதுரை கிழக்கு, மேற்கு, திருப்பரங்குன்றம் ஊரகப் பகுதிகளில் நாளை காலை 6 மணி முதல் 30ஆம் தேதி வரை முழு ஊரடங்கு அமலுக்கு வருவதாக அறிவிக்கப்பட்டுள்ளது.

அதன்படி, இந்த பகுதிகளில் மருத்துவமனைகள், மருந்தகங்கள் உள்ளிட்ட அத்தியாவசிய சேவைகள் இயங்கலாம். ஆட்டோ, டாக்ஸி, தனியார் வாகனங்கள் இயங்க அனுமதி இல்லை. ஆனால், மருத்துவ தேவைகளுக்கு, விமான, ரயில் நிலையங்களில் இருந்து வருபவர்களை அழைத்து வர இந்த வாகனங்களுக்கு அனுமதி அளிக்கப்படுகிறது. ரேஷன் கடைகள் காலை 8 மணி முதல் பிற்பகல் 2 மணி வரை இயங்கலாம். காய்கறி கடைகள், பெட்ரோல் பங்குகள், மளிகை கடைகள் காலை 6 மணி முதல் பிற்பகல் 2 மணி வரை இயங்கலாம் என தெரிவிக்கப்பட்டுள்ளது.

இந்நிலையில் மற்ற மாவட்டங்களிலும் கொரோனா பரவல் வேகத்தைத் தடுக்க வணிகர் சங்கங்கள் தாமாகவே முன்வந்து கடைகளில் நேரக் குறைப்பைக் கொண்டு வந்துள்ளன. திருப்பூர் வணிகர் சங்கத்தினர் கடைகள் காலை 7 மணி முதல் மாலை 5 மணி வரை மட்டுமே திறந்திருக்கும் என அறிவித்துள்ளனர்.

திண்டுக்கல்லில் நாளை முதல் 30ஆம் தேதி வரை கடைகள் காலை 6 மணி முதல் 5 மணி வரை மட்டுமே திறந்திருக்கும் என அறிவிக்கப்பட்டுள்ளது. சேலம் மாநகரில் கடைகள் காலை 6 மணி முதல் 4 மணி வரை திறந்திருக்கும் என்றும், ராமநாதபுரத்தில் காலை 7 மணி முதல் 3 மணி வரையிலும், விழுப்புரத்தில் காலை 6 மணி முதல் 4 மணி வரையிலும் கடைகள் திறந்திருக்கும் என்றும் அறிவிக்கப்பட்டுள்ளது. பொது மக்கள் மற்றும் வணிகர்களின் நலன் கருதி இந்த முடிவு எடுக்கப்பட்டுள்ளதாக தெரிவிக்கப்பட்டுள்ளது.

மேலும் நாமக்கல் மாவட்ட ஆட்சியர், மஹாராஜ் காய்கறி, பலசரக்கு கடைகள் காலை 6 மணி முதல் மாலை 5 மணி வரை, பிற வணிக நிறுவனங்கள் காலை 9 மணி முதல் 5 மணி வரை இயங்க வேண்டும் என தெரிவித்துள்ளார்.

இந்நிலையில் மாவட்ட ஆட்சியர்களுடன் முதலமைச்சர் எடப்பாடி பழனிசாமி நாளை காலை 10 மணிக்கு ஆலோசனை நடத்துகிறார். காணொலி மூலம் நடைபெறும் ஆலோசனையில் தடுப்பு பணிகளை தீவிரப்படுத்துவது தொடர்பாக விவாதிக்க உள்ளார். இந்தக் கூட்டத்தில் அதிக பாதிப்புள்ள மாவட்டங்களில் முழு ஊரடங்கை அமல்படுத்துவது தொடர்பாக முடிவெடுக்க வாய்ப்புள்ளதாக கூறப்படுகிறது.

 

 

Thanks To: Samaiyam

About Admin

Check Also

கோவை மாவட்டத்தை திமுக புறக்கணிக்கிறதா? மாஜி அமைச்சர் வேலுமணி

கோவை அதிமுக தலைமை அலுவலகத்தில் முன்னாள் அமைச்சர் எஸ் பி வேலுமணி கூறியதாவது:கோவைக்கு வந்த ஸ்டாலின் சாலைகளை சீரமைக்க உத்தரவிடுவார் …

Leave a Reply

Your email address will not be published. Required fields are marked *

MyHoster