சேலத்தில் காஸ் சிலிண்டர் வெடித்து 3 வீடுகள் தரைமட்டம்: 5 பேர் பலி

சேலம்: சேலத்தில் சிலிண்டர் வெடித்ததில் 3 வீடுகள் இடிந்து விழுந்தது. இடிபாடுகளில் சிக்கியவர்களில் ஐந்து பேர் உயிழந்த சம்பவம் பெரும் பரபரப்பை ஏற்படுத்தியுள்ளது. காயமடைந்தவர்கள் மீட்கப்பட்டு அரசு மருத்துவமனையில் சிகிச்சை அளிக்கப்பட்டு வருகிறது.

சேலம் கருங்கல்பட்டி பாண்டுரங்கநாதர் கோவில் தெருவில் இன்று (நவ.,23) காலை 6.30 மணிக்கு சிலிண்டர் வெடித்ததில் 3 வீடுகள் இடிந்து விழுந்தது. இதில் சிக்கிய 5 வயது பெண் குழந்தை உள்ளிட்ட 10 நபர்களை மீட்கும் பணியில் தீயணைப்பு துறையினர், பேரிடர் மீட்பு துறையினர் ஈடுபட்டுள்ளனர். காஸ் வெடித்து இடிந்த கட்டிடத்தில் இருந்து தீயணைப்பு துறையினர் குழந்தை பூஜாஸ்ரீயை மீட்டனர்.

இந்த இடிபாடுகளில் வெங்கட்ராமன் (62), இந்திராணி (54), மோகன்ராஜ் (40), நாகசுதா (30), கோபால் (70), தனலட்சுமி (64), சுதர்சன் (6), கணேசன் (37), உஷாராணி (40), லோகேஷ் (18), முருகன் (46) ஆகியோர் படுகாயம் அடைந்தனர். கோபி (52) இவர் 90 சதவீதம் தீக்காயத்துடன் ஆபத்தான நிலையில் உள்ளார். ராஜலட்சுமி மற்றும் தீயணைப்பு சிறப்பு அலுவலர், பத்மநாபன், அவரது மனைவி தேவி, வாலிபர் கார்த்திக் ராம், எல்லம்மாள் ஆகியோர் இடிபாடுகளில் சிக்கி சம்பவ இடத்திலேயே உயிரிழந்தனர்.

மேலும் இடிபாடுகளில் சிக்கி யாரேனும் உயிரிழந்தார்களா? என்று தெரியவில்லை. தீயணைப்புத்துறையினரும், பேரிடர் மீட்புத் துறையினரும் தொடர்ந்து மீட்புப் பணியில் ஈடுபட்டு வருகின்றனர். பலி எண்ணிக்கை மேலும் உயரும் என்று அஞ்சப்படுகிறது.