Rathiri Rounds Never Stop
Related Articles
கஸ்தூரி ராஜா இயக்கத்தில் ராஜ்கிரண் ஹீரோவாக நடித்த என் ராசாவின் மனசிலே படத்தின் மூலம் கோலிவுட்டில் அறிமுகமானார் வடிவேலு. தனது வித்தியாசமான பாடி லேங்குவேஜ், டயலாக் டெலவரியால் கோலிவுட்டின் முன்னணி நகைச்சுவை நடிகர் ஆனார்.
ஒரு கட்டத்தில் வடிவேலு ஹீரோவாகவும் ஆனார். அவர் சிம்புதேவன் இயக்கத்தில் ஹீரோவாக நடித்த இம்சை அரசன் 23ம் புலிகேசி படம் சூப்பர் ஹிட்டானது. அந்த பட வசனங்கள் இன்றும் கூட பிரபலம். 23ம் புலிகேசி ஹிட்டானதை பார்த்துவிட்டு அதன் அடுத்த பாகத்தை 24ம் புலிகேசி என்கிற பெயரில் சிம்புதேவன் இயக்கினார். அந்த படத்தை பிரமாண்ட இயக்குநர் ஷங்கர் தயாரித்தார்.
ரூ. 6 கோடி செலவில் செட் போட்டு படப்பிடிப்பை துவங்கிய 10வது நாளே வடிவேலுவுக்கும், சிம்புதேவனுக்கும் இடையே பிரச்சனை ஏற்பட்டது. இதையடுத்து நின்றுபோன படப்பிடிப்பு இதுவரை நடக்கவில்லை. 24ம் புலிகேசி படத்தில் நடிக்க மறுத்து பிரச்சனை செய்ததால் வடிவேலுவின் கெரியர் பாதிக்கப்பட்டது.
வடிவேலு மீது படக்குழு சார்பில் தயாரிப்பாளர் சங்கத்தில் புகார் அளிக்கப்பட்டது. அதற்கு அவரோ, படப்பிடிப்பை துவங்க தாமதமானதால் எனக்கு மன உளைச்சல் ஏற்பட்டதுடன், பொருளாதார இழப்பும் ஏற்பட்டதால் இனியும் அந்த படத்தில் நடிக்க முடியாது என்றார். தொடர்ந்து படத்தில் நடிக்காவிட்டால் வடிவேலு ரூ. 9 கோடி நஷ்டஈடு கொடுக்க வேண்டும் என்று ஷங்கர் தயாரிப்பாளர்கள் சங்கத்தில் தெரிவித்தார்.
ரூ. 9 கோடி கொடுப்பதற்கு பதில் நடித்துவிடலாம் என்கிற முடிவுக்கு வடிவேலு வந்துவிட்டதாக கூறப்பட்டது. ஆனால் இதுவரை 24ம் புலிகேசி படத்தின் வேலைகள் துவங்கவில்லை. வடிவேலுவை திரையில் புதுப்படங்களில் பார்த்து 3 ஆண்டுகள் ஆகிவிட்டது.
வடிவேலு உலக நாயகன் கமல் ஹாஸனின் தலைவன் இருக்கின்றான் படத்தில் நடிக்கப் போவதாக தகவல் வெளியானது. இந்நிலையில் வடிவேலு வெப் தொடரில் நடிக்கிறார் என்று கூறப்படுகிறது. தற்போது ரசிகர்களிடையே வெப் தொடர்கள் அதிக பிரபலமாகி வருவதால் கோலிவுட் கலைஞர்கள் தங்களின் கவனத்தை அந்த பக்கம் திருப்பி வருகிறார்கள்.
இந்நிலையில் வடிவேலுவும் தன் கவனத்தை வெப் தொடர் பக்கம் திருப்பியிருக்கிறாராம். இது தொடர்பாக ஓடிடி நிறுவனம் ஒன்று வடிவேலுவுடன் பேச்சுவார்த்தை நடத்தியதாம். அப்பொழுது வடிவேலு பெரும் தொகையை சம்பளமாக கேட்டதாகவும், அந்த தொகையை கொடுக்க அந்த நிறுவனம் ஒப்புக் கொண்டதாகவும் தகவல் வெளியாகியுள்ளது.
வடிவேலுக்கு வசனம் எழுதிய ஒருவர் தான் அந்த வெப் தொடரை இயக்கப் போகிறாராம். ஆம், வடிவேலு நடிக்கும் வெப் தொடர் முழுக்க முழுக்க காமெடியாக இருக்குமாம். இது குறித்த அதிகாரப்பூர்வ அறிவிப்பு வரும் வரை காத்திருக்க வேண்டியது தான்.
ஏனென்றால் வடிவேலு வெப் தொடரில் நடிக்கிறார் என்று கடந்த ஆண்டு கூட செய்திகள் வெளியாகின. அதை பார்த்த வடிவேலு நான் எந்த வெப் தொடரிலும் நடிக்கவில்லை என்றார். வடிவேலுவை பற்றி ஏதாவது வதந்தி பரவுவது வழக்கமாகிவிட்டதால் அதிகாரப்பூர்வ அறிவிப்பை பார்க்கும் வரை நம்ப முடியாது.
வடிவேலு படங்களில் நடிக்காவிட்டாலும் மீம்ஸுகள் மூலம் தினம் தினம் ரசிகர்களை சந்தித்துக் கொண்டிருக்கிறார் என்பது குறிப்பிடத்தக்கது.
Source : tamil.samayam
