வியாழனை விட ஒன்றரை மடங்கு பெரியக் கோள்:இந்திய விஞ்ஞானிகள் கண்டுபிடிப்பு

பெங்களூரு: ஆமதாபாத்தை தலைமையிடமாக கொண்ட இயற்பியல் ஆய்வு கூடத்தின் புறக்கோள்கள் கண்டுபிடிப்பு மற்றும் ஆய்வுக் குழு, வியாழனை விட ஒன்றரை மடங்கு பெரிய புறக்கோளை கண்டுபிடித்துள்ளது.

ராஜஸ்தானில் உள்ள மவுண்ட் அபு வான் ஆய்வு நிலையத்தில் 1.2 மீட்டர் தொலைநோக்கி உள்ளது. அதனுடன் பாரஸ் (PRL Advanced Radial-velocity Abu-sky Search) ஆப்டிகல் பைபர்- பீட் ஸ்பெக்ட்ரோகிராப் கருவியை இணைத்து இந்த புறக்கோளை கண்டுபிடித்துள்ளனர்.

TOI 1789b என்று பெயரிடப்பட்டுள்ள இப்புறக்கோளின் நிறை 70 சதவீதமாகவும், வியாழனை விட 1.4 மடங்கு அளவில் பெரிதாகவும் உள்ளதாக தெரிவித்தனர். இக்கோள் சூரியனை விட 1.5 மடங்கு நிறை கொண்ட பழமையான நட்சத்திரத்துக்கு அருகில் சுற்றுவதாக இஸ்ரோ கூறுகிறது. இது 725 ஒளி ஆண்டுகளுக்கு அப்பால் உள்ளது.

பேராசிரியர் அபிஜித் சக்ரவர்த்தி தலைமையிலான குழு இந்த புறக்கோளை கண்டுபிடித்து உள்ளது. அவரது குழுவில் மாணவர்கள் மற்றும் குழு உறுப்பினர்கள், ஐரோப்பிய மற்றும் அமெரிக்க பங்கேற்பாளர்கள் இடம்பெற்றிருந்தனர். மவுண்ட் அபு தொலைநோக்கியில் பாராஸை பயன்படுத்தி கண்டுபிடிக்கப்பட்ட இரண்டாவது புறக்கோள் இதுவாகும். 2018-ல் முதல் முறையாக 600 ஒளி ஆண்டுகள் தொலைவில் உள்ள கே2-236பி எனும் கோள் கண்டுபிடிக்கப்பட்டது.