பாஜகவுக்கு 60 சீட்: என்ன செய்ய போகிறது அதிமுக?

மத்திய அரசுடன் இணக்கமாக சென்று மாநிலத்திற்கு தேவையான திட்டங்களை கேட்டுப்பெறுகிறோம் என அதிமுகவின் தலைமை நிர்வாகிகள் இதற்கு விளக்கம் சொன்னாலும் அந்த இணக்கம் எந்த எல்லை வரை செல்கிறது என்பதை மக்கள் பார்த்துக்கொண்டிருக்கிறார்கள் என எச்சரிக்கின்றனர் அரசியல் விமர்சகர்கள். அமித் ஷா முன்னிலையில் முதல்வரும், துணை முதல்வரும் மாறி மாறி அதிமுக – பாஜக கூட்டணி தொடர்கிறது என உறுதியளித்தனர். இதைக் கேட்டுக்கொண்ட அமித் ஷா விழாவில் மற்ற அரசியலை எல்லாம் பேசினாலும் கூட்டணி பற்றி முதல்வர், துணை முதல்வர் பேசியதற்கு எந்த பதிலும் அளிக்கவில்லை.

அதிமுகவின் அவசரத்துக்கு காரணம் இல்லாமல் இல்லை. ஒருவேளை பாஜக வேறு சில கட்சிகளை இணைத்துக் கொண்டு ரஜினியை அழைத்து வந்து மூன்றாவது அணி கட்டிவிடுமோ என்ற பயம் அதிமுகவின் தலைமைக்கு இருந்தது, இப்போது இல்லை என்றும் உறுதியாக சொல்லிவிட முடியாது. அதனாலே அந்த முயற்சிக்கு முட்டுக்கட்டை போடும் விதமாகவே பாஜகவை தங்கள் பக்கத்தில் வைத்துக் கொள்வது என்ற முடிவுக்கு அதிமுக தலைமை வந்தது என்கிறார்கள் அரசியல் நோக்கர்கள்.

பாஜகவோ இன்னமும் பொதுவெளியில் அதிமுகவுடன் கூட்டணி என உறுதியாக அறிவிக்கவில்லை. ஆனால் திரைமறைவில் சீட்டு எண்ணிக்கை தொடர்பான பேச்சுவார்த்தைகள் நடைபெற்று வருகின்றன. அதிமுக வலிய வந்து வண்டியில் ஏறியதால் தங்களுக்கு அறுபது சீட் என்ற பேச்சிலிருந்து இறங்கி வரவே இல்லை என்கின்றனர். பாஜகவுக்கு சாதகமான 100 தொகுதிகள் என ஒரு பட்டியலை கொடுத்து அதில் 60 இடங்களில் டிக் அடித்திருக்கிறார்களாம். அந்த இடங்கள் தங்களுக்கு தேவை என பாஜக உறுதியாக இருக்கிறது.

இது அதிமுகவுக்கு தலைவலியாக மாறியுள்ளது என்கிறார்கள். பாஜகவுக்கு சாதகமான தொகுதிகள் என்ற பட்டியல் என்பது அதிமுக வலுவாக உள்ள தொகுதிகளின் பட்டியலாக உள்ளது. அதிமுக போட்டியிட்டால் வெற்றி பெற்றுவிடலாம் என்று எந்தெந்த தொகுதிகள் இருக்கிறதோ அதை தான் பாஜக அதிமுக கையிலேயே கொடுத்துள்ளது என்கிறார்கள். இதனால் அதிர்ச்சியடைந்துள்ள அதிமுக தலைமை மற்ற பாஜகவுடன் தொடர்ந்து பேசிவருகிறது.

சரியான அடித்தளமே இல்லாத பாஜகவுக்கே 60 இடங்கள் என்றால் கூட்டணியில் இடம்பெற்றுள்ள பாமக, தேமுதிக உள்ளிட்ட பிற கட்சிகளுக்கு எத்தனை இடங்கள் ஒதுக்குவது என்ற கேள்வி எழுந்துள்ளது. கூட்டணிக் கட்சிகளுக்கு ஒதுக்கியது போக அதிமுக எத்தனை தொகுதிகளில் களம் காணும் என்பதும் கவனத்தில் கொள்ள வேண்டியுள்ளது. ஜெயலலிதா உயிரோடிருந்த வரை கூட்டணிக் கட்சிகளுடன் சீட் எண்ணிக்கை குறித்த பேச்சுவார்த்தை நிறைவடையும் முன்னரே அதிமுக சார்பில் வேட்பாளர்களையே அறிவித்துவிடுவார். கூட்டணிக் கட்சிகளுக்கு அவரது நடவடிக்கை கிலியை ஏற்படுத்தும். அதன் பின்னர் வேகமாக கூட்டணி பேச்சுவார்த்தை இறுதி கட்டத்தை எட்டும். அப்போதும் அதிமுக கையே ஓங்கியிருக்கும். ஆனால் இப்போது நிலைமை தலைகீழாக மாறிவிட்டது.

ரஜினிகாந்த் கட்சி தொடங்குவது குறித்த அறிவிப்பை வெளியிடுவாரா, மாட்டாரா என்ற நிலையிலேயே பாஜகவுடன் கூட்டணி என அதிமுக அறிவித்திருந்த நிலையில், தற்போது அவர் அறிவித்துவிட்டபடியால் இன்னும் கவனமாகவே கூட்டணிக் கட்சிகளை கையாள வேண்டிய நிர்பந்தத்துக்கு ஆளாகியுள்ளது. இந்நிலையில் தான் அதிமுகவின் முக்கிய நிர்வாகிகளின் ஆலோசனைக் கூட்டம் இன்று மாலை தலைமை அலுவலகத்தில் நடைபெறவுள்ளது. முதல்வர் எடப்பாடி பழனிச்சாமி, துணை முதல்வர் ஓ.பன்னீர் செல்வம், மூத்த அமைச்சர்கள், மண்டல பொறுப்பாளர்கள், மாவட்ட செயலாளர்கள் உள்ளிட்ட கட்சியின் முக்கிய நிர்வாகிகள் கலந்து கொள்கின்றனர்.

இந்தக் கூட்டத்தில் சட்ட மன்றத் தேர்தலை எதிர்கொள்வது குறித்து முக்கிய முடிவுகள் எடுக்கப்படும் என தெரிகிறது. கூட்டணிப் பேச்சுவார்த்தைகள், ரஜினிகாந்த அரசியல் வருகை, தேர்தல் பிரச்சாரம் என பல்வேறு விஷயங்கள் குறித்து ஆலோசிக்கப்பட உள்ளதாக கூறப்படுகிறது.

Thanks to : samaiyam