ரிலீசுக்கு முன்னரே சசிகலாவை சந்திக்கும் திட்டம்!

Related Articles

திருவண்ணாமலையில் சத்குரு தவபலேஸ்வரர் குருபூஜை விழா

December 23, 2021

கலவை தாலுகா அலுவலகத்திற்கு நள்ளிரவில் வந்த கலெக்டர்

November 29, 2021

அரசியல் சாசனப்படி குடிமக்களின் உரிமைகளை காக்கவேண்டும் : மோடி

November 26, 2021

விரைவில் சிறையில் இருந்து விடுதலை ஆகவுள்ள நிலையில், அதற்கு முன்னரே சிறைக்குள் சசிகலாவை சந்திக்க திட்டமிடப்பட்டுள்ளது. முன்னதாக கொரோனா கட்டுப்பாடுகள் தளர்த்தப்பட்டதை அடுத்து, சசிகலா உறவினர்களின் கோரிக்கை ஏற்கப்பட்டுள்ளது.

அடுத்த ஆண்டு நடைபெறவுள்ள சட்டமன்ற தேர்தலும், சசிகலா விடுதலையும் தமிழக அரசியலில் தொடர்ந்து பேசுபொருளாக இருந்து வருகிறது. இதுதொடர்பான தகவல்கள் வெளியாகிக் கொண்டிருக்கும் நிலையில், இரண்டையும் இணைத்துப் பார்க்கும் விஷயங்களும் அரங்கேறிக் கொண்டிருக்கின்றன. சசிகலா விடுதலைக்கு பின்னர் அதிமுகவில் காட்சிகள் மாறலாம். கூட்டணிகள் இடம் மாறலாம் என்று எதிர்பார்க்கப்படுகிறது. இவரது வருகைக்கு முன்னரே அதிமுகவில் பொதுச் செயலாளர் பதவி, முதல்வர் நாற்காலி என துணை முதல்வர்

ஓ.பன்னீர்செல்வம் மூலம் காய்கள் நகர்த்தப்படுவதாக தகவல்கள் வெளியாகி வருகின்றன. அதேசமயம் சிறைக்குள் நான்கு ஆண்டுகளை கழித்துள்ள சசிகலாவும் தன்னை மேம்படுத்திக் கொள்ள தவறவில்லை. கன்னட மொழி பயிற்சி, தோட்டக்கலை உள்ளிட்டவற்றில் கைதேர்ந்துள்ளார்.

இதனால் நன்னடத்தை சார்ந்த விஷயங்கள் சசிகலா பக்கம் நிற்க விடுதலை முன்கூட்டியே நிகழும் என்ற எதிர்பார்ப்பு நிலவுகிறது. முன்னதாக வரும் ஜனவரி மாதம் 27ஆம் தேதி பெங்களூரு பரப்பன அக்ரஹார சிறையில் இருந்து சசிகலா விடுதலை ஆவார் என்று சிறைத்துறை நிர்வாகம் அதிகாரப்பூர்வமாக அறிவித்தது. இருப்பினும் முன்கூட்டியே வெளியே கொண்டு வருவதற்கான வேலைகளில் டிடிவி தினகரன் ஈடுபட்டார்.

 

இதையொட்டி நீதிமன்றம் விதித்த அபராதத் தொகையை சசிகலா தரப்பு செலுத்திவிட்டது. இதேபோல் இளவரசி, சுதாகரன் ஆகியோருக்கு விதிக்கப்பட்ட அபராதமும் உரியவர்கள் மூலம் செலுத்தப்பட்டு விட்டது. கடைசியாக கடந்த மார்ச் மாதம் பெங்களூரு சிறையில் சசிகலாவை அவர் தரப்பினர் நேரில் சந்தித்துள்ளனர். அதன்பிறகு கொரோனா கட்டுப்பாடுகள் காரணமாக சந்திப்பு சாத்தியமாகவில்லை.

எனவே கடிதம் வாயிலாகவே தொடர்பு கொண்டு வந்துள்ளனர். தற்போது கர்நாடக மாநில அரசு பல்வேறு தளர்வுகளை அறிவித்துள்ளது. இதையொட்டி அவரது உறவினர்கள் நேரில் சந்திக்க ஆர்வம் காட்டியுள்ளனர். இதற்காக சிறை நிர்வாகத்திடம் விண்ணப்பித்திருந்தனர். இதனை ஏற்றுக் கொண்டு வரும் 13ஆம் தேதி சசிகலாவை சந்திக்க சிறை நிர்வாகம் அனுமதி அளித்திருப்பதாக தெரியவந்துள்ளது.

 

ஆனால் நேரடியாக சந்திக்க அனுமதிக்காமல், வீடியோ வாயிலாக பேச வாய்ப்பளிக்கப்படும் என்று கூறப்படுகிறது. இதையொட்டி டிடிவி தினகரன் பெங்களூரு புறப்பட்டுச் சென்றுள்ளார். அதேசமயம் சசிகலா யாரை சந்திக்க விரும்புகிறாரோ, அவர்கள் மட்டும் அனுமதிக்கப்படுவர் என்று தெரிகிறது. இந்த சந்திப்பு விடுதலைக்கு பின்னர் அரங்கேறும் விஷயங்களுக்கு அச்சாரமாக இருக்கும் என்று எதிர்பார்க்கப்படுகிறது.

 

Thanks to : samaiyam