Rathiri Rounds Never Stop
Related Articles
அதிமுகவின் முதல்வர் வேட்பாளராக அறிவிக்கப்பட்டுள்ள எடப்பாடி பழனிசாமி ஜெயலலிதா பாணியில் ஒரு திட்டமிட்டுள்ளார்.
சட்டமன்றத் தேர்தல் நெருங்கிக் கொண்டிருக்கும் நிலையில் தமிழக அரசியல் களம் சூடாகிவருகிறது. அதிமுக தொடர்ந்து இரண்டாவது முறையாக ஆட்சியை நடத்திக் கொண்டிருந்தாலும், ஜெயலலிதாவின் மறைவுக்குப் பின்னர் தற்போதுள்ள தலைமை தங்கள் செல்வாக்கை நிரூபித்துக் காட்ட வேண்டிய தேர்தல் இதுவாகும்.
ஜெயலலிதா அமைத்துக் கொடுத்த ஆட்சியில்தான் எடப்பாடி பழனிசாமி சவாரி செய்கிறார் என்ற பேச்சை மாற்றிக்காட்ட அதிமுக துடிக்கிறது. அதேசமயம் கள நிலவரங்கள் தமக்கு சாதமாக இருக்கிறதா என்பதையும் எடப்பாடி பழனிசாமி ஆராய்ந்து வருகிறார். உளவுத்துறை, அதிமுகவின் உத்தி வகுப்பாளர் சுனில் ஆகியோரிடமிருந்து அவ்வப்போது தகவல்களைப் பெற்று வருகிறார்.
மக்களவைத் தேர்தலில் அதிமுகவுக்கு மிகப் பெரிய அடி விழுந்த நிலையில் சட்டமன்றத் தேர்தலில் மிகுந்த எச்சரிக்கையுடன் செயல்பட வேண்டும் என எடப்பாடி பழனிசாமி நினைக்கிறார். பெரும் பஞ்சாயத்துக்குப் பின்னர் அதிமுகவின் முதல்வர் வேட்பாளராக எடப்பாடி பழனிசாமிதான் போட்டியிடுவார் என ஓபிஎஸ் வாயாலே சொல்ல வைத்தது இபிஎஸ்ஸின் வெற்றி என்று அவரது ஆதரவாளர்கள் கூறிவருகின்றனர். இந்நிலையில் இந்தத் தேர்தலில் கொங்கு மண்டலத்தில் பெரும்பாலான தொகுதிகளில் அதிமுக வெற்றி பெற்றாக வேண்டும் என்று திட்டம் வகுத்துள்ளனர்.
ஆனால் எடப்பாடி தொகுதியில் வெற்றி பெற முடியுமா எனும் சந்தேகமும் எழுந்துள்ளதாக அக்கட்சி வட்டாரத்தில் எழுந்துள்ளது. நாடாளுமன்ற தேர்தலில் முதல்வரின் எடப்பாடி தொகுதியை உள்ளடக்கிய சேலம் மக்களவைத் தொகுதியில் அதிமுக தோல்வியைச் சந்தித்தது. அப்படியான சறுக்கல் இந்த முறை ஏற்பட்டுவிடுமோ என்ற அச்சம் எடப்பாடி பழனிசாமி தரப்புக்கு ஏற்படாமல் இல்லை. அதனாலே தொகுதி மாறும் யோசனையில் இறங்கியுள்ளார் எடப்பாடி பழனிசாமி.
கொங்கு வேளாளர்கள் அதிகமுள்ள தொகுதிகளை குறிவைத்து எடப்பாடி களமிறங்குவார் என கூறப்படுகிறது. காங்கேயம், சூலூர், பல்லடம், சேலம் மேற்கு ஆகிய தொகுதிகளில் ஒன்றில் எடப்பாடி பழனிசாமியை களமிறக்க முயற்சிகள் நடைபெற்று வருகிறது. அதே சமயம் எடப்பாடி தொகுதியை விட்டுக்கொடுக்காமல், எடப்பாடியிலும், இந்த நான்கு தொகுதிகளில் ஏதேனும் ஒன்றிலும் என ஒரே நேரத்தில் இரு தொகுதிகளில் போட்டியிட பழனிசாமி திட்டமிட்டுள்ளதாக தகவல்கள் வெளியாகியுள்ளன.
ஒரே நேரத்தில் இரு தொகுதிகளில் போட்டியிடுவதை ஜெயலலிதா சில முறை பின்பற்றியுள்ளதால் அதை பின் தொடர்ந்து எடப்பாடி பழனிசாமியும் களம் காண்பார் என்று நம்பிக்கை தெரிவிக்கின்றனர் அவரது ஆதரவாளர்கள். அந்த நம்பிக்கை செயல் வடிவம் பெறுகிறதா என்பதை பொறுத்திருந்து தான் பார்க்க வேண்டும்.
Thanks to : samaiyam
