அடுத்த பேரழிவை ஆரம்பித்து வைக்கிறதா சீனா?-புதுவகை வைரஸ்!!

Related Articles

திருவண்ணாமலையில் சத்குரு தவபலேஸ்வரர் குருபூஜை விழா

December 23, 2021

கலவை தாலுகா அலுவலகத்திற்கு நள்ளிரவில் வந்த கலெக்டர்

November 29, 2021

வறுமை பட்டியல் வெளியீடு: பீஹார் மாநிலம் முதலிடம்

November 26, 2021

உலகமே கொரோனா வைரஸ் பாதிப்பால் தவித்துக் கொண்டிருக்கும் சூழலில் புதுவகை பன்றி காய்ச்சல் வைரஸ் சீனாவில் கண்டுபிடிக்கப்பட்டுள்ளது.

 

கொரோனா வைரஸ் மிகப்பெரிய தொற்று நோயாக உருவெடுத்துள்ளது. இது சீனாவில் இருந்து பரவத் தொடங்கி உலகம் முழுவதும் ஆட்கொண்டு விட்டது என்று சொல்லுமளவிற்கு மாறியுள்ளது. அதே சீனாவில் இருந்து புதிய வகை பன்றி காய்ச்சல் வைரஸ் கண்டுபிடிக்கப்பட்டுள்ளது. இது எளிதில் மனிதர்களுக்கு பரவும் என்று சொல்லப்படுவதால் மிகுந்த அச்சம் ஏற்பட்டுள்ளது. குறிப்பாக பன்றிகளுடன் வேலை செய்பவர்கள் எச்சரிக்கையாக இருக்க அறிவுறுத்தப்பட்டுள்ளது.

 

அமெரிக்காவின் அறிவியல் இதழான PNAS-ல் நேற்று முக்கிய செய்தி ஒன்று வெளியிடப்பட்டுள்ளது. அதில் சீனாவில் புது வகையான பன்றி காய்ச்சல் வைரஸை ஆராய்ச்சியாளர்கள் கண்டுபிடித்துள்ளனர். இது மிகப்பெரிய பாதிப்பை ஏற்படுத்தக்கூடிய திறன் பெற்றது என்று குறிப்பிடப்பட்டுள்ளது. இந்த வைரஸ் கடந்த 2009ஆம் ஆண்டு உலகின் பல்வேறு நாடுகளில் மிகப்பெரிய பாதிப்பை ஏற்படுத்திய H1N1-ல் இருந்து மரபு ரீதியாக மாற்றம் பெற்று காணப்படுகிறது.

இதற்கு G4 என்று விஞ்ஞானிகள் பெயரிட்டுள்ளனர். இதுபற்றி சீன பல்கலைக்கழக மற்றும் சீன நோய் கட்டுப்பாட்டு மற்றும் தடுப்பு மைய விஞ்ஞானிகள் கூறுகையில், மனிதர்களுக்கு எளிதில் பரவக்கூடிய அனைத்து சாத்தியக் கூறுகளும் புதிய வைரஸில் இருப்பதாக அதிர்ச்சிகர தகவலை வெளியிட்டுள்ளனர். கடந்த 2011ஆம் ஆண்டு முதல் 2018ஆம் ஆண்டு வரை சீனாவின் 10 மாகாணங்களில் உள்ள இறைச்சிக் கூடங்கள் மற்றும் கால்நடை மருத்துவமனைகளில் பன்றிகளில் இருந்து 30,000 சளி மாதிரிகளை ஆராய்ச்சியாளர்கள் எடுத்துள்ளனர்.

இவற்றின் மூலம் 179 பன்றி காய்ச்சல் வைரஸ்கள் கண்டறியப்பட்டன. இதில் பெரும்பாலானவை புதிய வகையைச் சேர்ந்தவை. அதேசமயம் இவை 2016ஆம் ஆண்டில் இருந்து பன்றிகளில் ஆதிக்கம் செலுத்திக் கொண்டிருப்பது தெரியவந்துள்ளது. இதையடுத்து பெரட் எனப்படும் விலங்கின் மீது பல்வேறு பரிசோதனைகளை ஆராய்ச்சியாளர்கள் மேற்கொண்டனர்.

 

ஏனெனில் ப்ளூ போன்றவற்றின் பரிசோதனைகளில் இந்த வகை விலங்கே அதிகம் பயன்படுத்தப்பட்டது. இவற்றிற்கு மனிதர்களைப் போன்றே காய்ச்சல், இருமல், தும்மல் ஆகியவை ஏற்படும் என்பது குறிப்பிடத்தக்கது. இந்த ஆய்வின் மூலம் G4 வைரஸ் ஆனது எளிதில் தொற்றக் கூடியது. மேலும் மனிதர்களின் செல்களில் விரைவாக பெருக்கமடையக் கூடியவை.

இது பெரட் விலங்கில் வேறெந்த வைரஸும் ஏற்படுத்தாத மோசமான அறிகுறிகளை வெளிப்படுத்தியது தெரியவந்துள்ளது. ப்ளூ காய்ச்சல் ஏற்பட்டு அதன்மூலம் மனிதர்களுக்கு ஆன்டிபாடி உருவாகி நோய் எதிர்ப்பு மண்டலம் வலுவடைந்திருந்தாலும் G4 வைரஸை எதிர்க்கும் திறனை அளிக்காது என்று ஆராய்ச்சிகளின் மூலம் கண்டறியப்பட்டுள்ளது.

 

இதுதொடர்பாக ரத்த பரிசோதனைகள் செய்து பார்க்கையில், இந்த வைரஸ் தொற்று ஏற்பட்டு அதற்கு எதிர்வினையாக ஆன்டிபாடிகள் உருவானவற்றில் 10.4 சதவீதம் பேர் வைரஸ் தொற்றுக்கு ஏற்கனவே ஆளானவர்கள் என்று தெரிகிறது. G4 வைரஸானது ஏற்கனவே விலங்குகளிடம் இருந்து மனிதர்களுக்கு பரவி இருக்கிறது. ஆனால் மனிதர்களிடம் இருந்து மனிதர்களுக்கு பரவியிருப்பதற்கான ஆதாரங்கள் ஏதும் இல்லை.

 

இது ஆராய்ச்சியாளர்களை கவலை கொள்ளச் செய்துள்ளது. இதுபற்றி ஆராய்ச்சி நடைபெற்று வருவதாக சொல்லப்படுகிறது. இந்த புது வகை வைரஸ் வருங்காலத்தில் மிகப்பெரிய தொற்று நோயாக மாறும் வாய்ப்பு அதிகம் இருப்பதாக ஆராய்ச்சியாளர்கள் தெரிவித்துள்ளனர். எனவே பன்றிகளுடன் வேலை செய்யும் மனிதர்கள் மீது மிகுந்த கவனம் செலுத்த வேண்டியது அவசியம்.

இதுபற்றி கேம்பிரிட்ஜ் பல்கலைக்கழகத்தின் கால்நடை மருத்துவ பிரிவின் தலைவர் ஜேம்ஸ் வுட் கூறுகையில், வனவிலங்குகளை விட மனிதர்களுடன் அதிகம் பழக்கத்தில் இருக்கும் விலங்குகளில் இருந்து பல்வேறு நோய்த் தொற்று ஏற்படுவதற்கான பாதிப்புகள் அதிகம் இருக்கிறது. எனவே வருங்காலம் மிகவும் கடினமானதாக இருக்கக்கூடும். இதற்கு தக்க வகையில் நாம் தயாராக வேண்டியது அவசியம் என்று குறிப்பிட்டுள்ளார்.

 

THANKS TO: NEWS 18