கொரிய தொடர்பு அலுவலகத்தை வடகொரியா அழித்ததை தொடர்ந்து வடகொரிய-தென்கொரிய உறவில் மீண்டும் விரிசல் ஏற்பட்டுள்ளது.
தென்கொரிய எல்லைப் பகுதியில் வடகொரியாவுக்கு எதிராக தொடர்ந்து சில அமைப்புகளும், செயற்பாட்டாளர்களும் துண்டுப் பிரசுரங்களை விநியோகித்து வருவதாகவும், அவர்கள் மீது உடனடியாக நடவடிக்கை எடுக்க வேண்டுமெனவும் தென்கொரியாவுக்கு வடகொரியா அழுத்தம் கொடுத்து வருகிறது.
1945ஆம் ஆண்டு உலகப் போரின் இறுதியில் வடகொரியா, தென்கொரியா இரண்டாகப் பிரிந்தன. இருநாடுகளுக்கும் இடையே நீண்டகாலமாக கசப்பான உறவு நிலவி வந்த நிலையில் 2018ஆம் ஆண்டில் இருநாடுகளுக்கும் இடையேயான தொடர்பை மேம்படுத்துவதற்காக வடகொரிய எல்லைப் பகுதியில் கேசோங் என்ற இடத்தில் முதல் தொடர்பு அலுவலகம் அமைக்கப்பட்டது.
இந்நிலையில், வடகொரிய எல்லைப் பகுதிக்குள் இருக்கும் கொரிய தொடர்பு அலுவலகத்தை இன்று அந்நாட்டு அரசு அழித்துள்ளதாக உறுதிப்படுத்தியுள்ளது. மக்களின் கோபத்தை வெளிப்படுத்தும் வகையில் அந்த அலுவலகம் அழிக்கப்பட்டதாக வடகொரிய அரசின் அதிகாரப்பூர்வ ஊடகம் செய்தி வெளியிட்டுள்ளது.
இந்த அலுவலகம் எப்படி அழிக்கப்பட்டது என்பது பற்றிய தகவல் வெளியாகவில்லை. ஆனால் ஒரு பெருவெடிப்புடன் அழிக்கப்பட்டதாக தகவல் வெளியாகியுள்ளது. மேலும், கொரிய அமைதி ஒப்பந்தப்படி ராணுவம் விலக்கப்பட்டுள்ள பகுதிகளில் மீண்டும் ராணுவப் படையினர் குவிக்கப்படுவார்கள் எனவும் வடகொரியா எச்சரித்துள்ளது.
இந்நிலையில், கொரிய உறவுகளை மேம்படுத்துவதற்காக அமைக்கப்பட்ட தொடர்பு அலுவலகத்தை அழித்தபிறகு மேலும் பதற்றத்தை அதிகரிக்க வடகொரியா முயற்சித்தால் கடுமையாக பதிலடி கொடுக்கப்படும் என தென்கொரிய அதிபர் அலுவலகம் எச்சரித்துள்ளது.
இதுகுறித்து தென்கொரிய தேசிய பாதுகாப்பு ஆலோசகர் கிம் யூ ஜூன் செய்தியாளர்களிடம் பேசுகையில், “தொடர்பு அலுவலகம் அழிக்கப்பட்டதன் விளைவாக, கொரிய உறவுகள் மேம்படும் எனவும், கொரிய தீபகற்பத்தில் அமைதி நீடிக்கும் எனவும் நம்பிய மக்களின் எதிர்பார்ப்புகள் நொறுங்கியுள்ளன. இதனால் ஏற்படும் எல்லா விளைவுகளுக்கும் வடகொரியாவே பொறுப்பு என்பதை தெளிவுபடுத்திக்கொள்கிறோம்” என்று தெரிவித்துள்ளார்.
Thanks To: Samaym News
Rathiri Rounds Never Stop