உலக செய்திகள்

மும்பை: இந்தியாவின் மிகப்பெரிய பணக்காரரும், ‘ரிலையன்ஸ் இண்டஸ்ட்ரீஸ்’ நிறுவனத்தின் தலைவருமான முகேஷ் அம்பானி, இரண்டாவதாக தன் குடும்பத்தினருக்காக ஒரு வீட்டை தயார் செய்து வருகிறார். ஆனால், இம்முறை இந்த வீடு இந்தியாவில் இல்லை; லண்டனில். அதேநேரத்தில், லண்டனில் முகேஷ் அம்பானி குடியேற போவதாக வெளியான தகவலையும் மறுத்துள்ளது.

லண்டன் பக்கிங்காம்ஷயரில் இருக்கும், 300 ஏக்கர் பரப்பளவில் அமைந்துள்ள ‘ஸ்டோக் பார்க்’ வீட்டை தயார் செய்து வருவதாக, ‘மிட் டே’ பத்திரிகை தெரிவித்துள்ளது. முகேஷ் அம்பானி குடும்பத்தினருக்கு, மும்பையில் மிகப்பெரும் பணக்காரர்கள் வசிக்கும் ‘அல்டாமவுன்ட்’ சாலையில், ‘அன்டிலியா’ எனும் பெயரில் மிகப்பெரிய வீடு உள்ளது.

கொரோனாவை முன்னிட்டு, அம்பானி குடும்பத்தினர் தங்களுடைய பெரும்பாலான நேரத்தை இந்த வீட்டிலேயே செலவிட்டனர். இதையடுத்து, லண்டனில் உள்ள வீடு தயார் செய்யப்பட்டு வருகிறது. இந்த வீட்டை, இவ்வாண்டின் துவக்கத்தில் தான், 592 கோடி ரூபாய்க்கு அம்பானி வாங்கினார். இந்த வீட்டில் மொத்தம் 49 படுக்கை அறைகள் உள்ளன. சிறப்பான மருத்துவ வசதிகளையும், இந்த ஆடம்பர வீடு கொண்டுள்ளது.

இதையடுத்து, முகேஷ் அம்பானி மற்றும் குடும்பத்தினர் அங்கு குடியேற உள்ளதாக சமூக வலைதளத்தில் தகவல் பரவின.
இதனை மறுத்துள்ள ரிலையன்ஸ் நிறுவனம், முகேஷ் அம்பானி மற்றும் அவரது குடும்பத்தினர் லண்டனில் குடியேற உள்ளதாக சமூக ஊடகங்களில் வெளியான செய்தியில் உண்மை இல்லை. அவை தேவையற்ற மற்றும் ஆதாரமற்ற யூகங்கள் அடிப்படையில் வெளியான செய்திகள். அம்பானி மற்றும் அவரது குடும்பத்தினர் லண்டன் அல்லது உலகில் வேறு எங்கும் இடம் பெயரவோ அல்லது வசிக்கவோ எந்த திட்டமும் இல்லை. ஸ்டான் பார்க் பங்களாவை, முதன்மையான கோல்ப் மற்றும் விளையாட்டு ரிசார்ட்டாக மேம்படுத்துவதை நோக்கமாக கொள்ளப்பட்டுள்ளது என தெரிவித்துள்ளது.

கோல்கட்டா: மேற்குவங்கத்தில் 4 சட்டசபை தொகுதிகளுக்கான இடைத்தேர்தலிலும் திரிணமுல் காங்கிரஸ் மிகப்பெரிய வெற்றிப் பெற்றது குறித்து கருத்து தெரிவித்த அக்கட்சி எம்.பி., சவுகதா ராய், ‛இடைத்தேர்தல் முடிவு எதிர்பார்த்தது போலவே அமைந்துள்ளது,’ எனத் தெரிவித்துள்ளார்.

மேற்கு வங்கத்தில் 4 சட்டசபை தொகுதிகளுக்கான இடைத்தேர்தல் கடந்த அக்.,30ம் தேதி நடைபெற்றது. இன்று (நவ.,2) நடைபெற்ற ஓட்டு எண்ணிக்கையில் காலியாக உள்ள தின்கடா தொகுதியில் 1.64 லட்சம் ஓட்டுகள் வித்தியாசத்திலும், சண்டிபூரில் 64 ஆயிரம் ஓட்டுகள் வித்தியாசத்திலும், கர்டஹா தொகுதியில் 93 ஆயிரம் ஓட்டுகள் வித்தியாசத்திலும், கொஸாபா தொகுதியில் 1.43 லட்சம் ஓட்டுகள் வித்தியாசத்திலும் திரிணமுல் காங்., வேட்பாளர்கள் அபார வெற்றிப் பெற்றனர். இது தொடர்பாக திரிணமுல் எம்.பி., சவுகதா ராய் செய்தியாளர்களிடம் கூறியதாவது:

மத்திய பா.ஜ., அரசின் செயல்பாடுகளால் மக்கள் அதிருப்தியில் இருக்கிறார்கள். இதைத்தான் தேர்தல் முடிவு காட்டுகிறது. நாங்கள் கடுமையாக போராடினோம். இடைத்தேர்தல் முடிவு எதிர்பார்த்தது போலவே அமைந்துள்ளது. தேர்தலுக்குப் பிந்தைய வன்முறைகள் எதுவும் இருக்கக்கூடாது என்று எங்கள் கட்சி அறிவுறுத்தியது. அப்படியான வன்முறை எதுவும் நடக்காது. இவ்வாறு அவர் கூறினார்.

கிளாஸ்கோ: 2030க்குள் காடுகள் அழிவைத் தடுக்க கிளாஸ்கோ மாநாட்டில் புதிய ஒப்பந்தம் இடப்பட்டுள்ளது.

இத்தாலி நாட்டின் கிளாஸ்கோ நகரில் நடந்த சிஓபி-26 மாநாட்டில் நூற்றுக்கும் மேற்பட்ட நாடுகளின் தலைவர்கள் பங்கேற்றனர். வரும் 2050ம் ஆண்டுக்குள் பருவநிலை மாற்றத்தை தவிர்க்க மேற்கொள்ள வேண்டிய நடவடிக்கைகள் குறித்து ஆராய்ந்தனர். கார்பன் புகையை கட்டுப்படுத்தும் அதேநேரத்தில் காட்டு வளங்களை காப்பது குறித்து விவாதிக்கப்பட்டது.

கடந்த 2014ம் ஆண்டு ஐநா., பருவநிலை மாற்ற கூட்டம் நியூயார்க்கில் நடைபெற்றது. அதில் வரும் 2030ம் ஆண்டுக்குள் உலகம் முழுக்க உள்ள வனங்களைக் காக்கவும் மரங்கள் வெட்டுவதை தவிர்க்கவும் ஒப்பந்தம் இடப்பட்டது.

ஆனால் வணிக நோக்கத்துக்காக பல நாடுகளில் மரங்கள் வெட்டப்பட்டு வருவது வாடிக்கையாகி விட்டது. பிரேசில் நாட்டில் உள்ள அமேசான் காடுகளில் வர்த்தக நோக்கத்துக்காக பல மரங்கள் வெட்டப்படுவதால் அந்நாட்டு அதிபர் போல்சனாரோ தீவிர விமர்சனத்திற்கு உள்ளானார்.

கிரீன்பீஸ் அமைப்பு கிளாஸ்கோவில் நடைபெற்ற பருவநிலை கூட்டத்தை விமர்சித்து இருந்தது. வரும் 2025ம் ஆண்டுக்குள் அமேசான் காடுகளில் உள்ள மரங்களில் 80 சதவீத மரங்களைக் காக்க உறுதிமொழி ஏற்கப்பட்டது.

ஆனால் தொடர்ந்து இந்த உறுதிமொழிகள் பொய்த்துப் போவதால் அடுத்தடுத்து உலக நாடுகள் காட்டு வளங்களை காக்க ஒப்பந்தம் இடுவதால் என்ன பயன் என்று கேள்வி எழுப்பியுள்ளது.

பிரேசில், இந்தோனேஷியா, காங்கோ, உள்ளிட்ட உலகில் 85 சதவீத காட்டு வளம் மிக்க நாடுகள் ஒப்பந்தம் ஒன்றை இட்டன. 20 பில்லியன் அமெரிக்க டாலர் மதிப்புள்ள இந்த ஒப்பந்தத்தில் பிரிட்டன் உள்ளிட்ட 11 நாடுகள் நிதி அளிக்க முன்வந்துள்ளன. 30-க்கும் மேற்பட்ட தனியார் நிறுவனங்கள் காட்டு வளங்களை அழிக்கும் எந்த திட்டத்திற்கும் தாங்கள் ஒத்துழைக்கப் போவதில்லை என்று உறுதி அளித்துள்ளன.

இந்த ஒப்பந்தம் குறித்து பிரிட்டன் பிரதமர் போரிஸ் ஜான்சன் கூறுகையில், முன் எப்போதும் இல்லாத அளவில் காட்டு வளங்களைக் காக்க இடப்பட்ட மிகப்பெரிய ஒப்பந்தம் இது என்று பெருமிதம் தெரிவித்துள்ளார்.

புதுடில்லி: ஜப்பானில் புதிய பிரதமராக பதவி ஏற்றிருக்கும் புமியோ கிஷாடாவுக்கு பிரதமர் நரேந்திர மோடி வாழ்த்து தெரிவித்துள்ளார்.

பல ஆண்டு காலமாக ஜப்பான் நாட்டில் லிபரல் ஜனநாயக கட்சி மக்கள் ஆதரவுடன் பெரும்பான்மை பெற்று ஆட்சி அமைத்து வருகிறது. கடந்த இரண்டாம் உலகப் போரை அடுத்து ஜப்பானில் இந்த கட்சிதான் மீண்டும் மீண்டும் மக்களால் தேர்வு செய்யப்படுகிறது.

இந்நிலையில் ஜப்பான் பார்லிமென்டின் கீழவைக்கு தேர்தல் நடைபெற்றது. இதில் 266 தொகுதிகளில் வெற்றி பெற்று இந்த கட்சி ஆட்சி அமைக்கும் என்று எதிர்பார்க்கப்பட்ட நிலையில் பெரும்பான்மைக்கு தேவையான 233 தொகுதிகளை கடந்து தற்போது வாக்குகள் எண்ணப்பட்டு வருகின்றன. இதனால், முன்னாள் ஜப்பான் அதிபர் பிரதமர் யோஷிஹிடே சுகாவை அடுத்து கட்சியினர் அடுத்து யாரை அப்பதவிக்கு தேர்ந்தெடுக்கப்படுவார் என விவாதித்து வந்தனர்.

இந்நிலையில் பிரதமர் பதவிக்கு கட்சியின் மூத்த உறுப்பினர்களுள் ஒருவரான புமியோ கிஷாடா தேர்வு செய்யப்பட்டுள்ளார்.

அவருக்கு பிரதமர் நரேந்திர மோடி தனது டுவிட்டர் பக்கத்தில் வாழ்த்து தெரிவித்துள்ளார். இந்தியா-ஜப்பான் ஆகிய இருநாடுகளும் தொடர்ந்து உலகளாவிய பங்கீட்டை வலுப்படுத்த வேண்டியது அவசியம் என்று பிரதமர் மோடி வலியுறுத்தி உள்ளார்.

கிளாஸ்கோ,: ”பருவநிலை மாறுபாடு பிரச்னையை எப்படி குறைப்பது என்பதற்கு காட்டும் முக்கியத்துவத்தை, இயற்கையுடன் இணைந்து செயல்படுத்துவதில் காட்டுவது இல்லை. பருவநிலை மாறுபாட்டால், இந்தியாவைப் போன்ற வளர்ந்து வரும் நாடுகளில் விவசாயம் பெரும் பாதிப்பை சந்தித்து வருகிறது,” என, பிரதமர் நரேந்திர மோடி குறிப்பிட்டார்.

ஐரோப்பிய நாடான இத்தாலியின் ரோம் நகரில் நடந்த ஜி – 20 நாடுகள் மாநாட்டில் பிரதமர் நரேந்திர மோடி பங்கேற்றார். அதைத் தொடர்ந்து ஸ்காட்லாந்தின் கிளாஸ்கோ நகரில் நடக்கும், ஐ.நா., பருவநிலை மாறுபாடு தொடர்பான மாநாட்டில் பிரதமர் பங்கேற்றார்.
அமெரிக்க அதிபர் ஜோ பைடன், பிரிட்டன் பிரதமர் போரிஸ் ஜான்சன் உள்ளிட்ட தலைவர்கள் இதில் பேசினர்.

மாநாட்டில் மோடி இன்று (நவ.01) பேசியதாவது:பருவநிலை மாறுபாடு பாதிப்பை எப்படி குறைப்பது என்பதில் உலக நாடுகள் அக்கறை காட்டுகின்றன. அதே நேரத்தில், இயற்கையோடு இணைந்து வாழ்வதற்கு முக்கியத்துவம் தரப்படுவதில்லை.
இது பருவநிலை மாறுபாட்டால் கடுமையாக பாதிக்கப்படும் வளர்ந்த நாடுகளுக்கு செய்யப்படும் அநீதி. நம் வளர்ச்சி கொள்கைகள் மற்றும் திட்டங்கள், இயற்கையுடன் இணைந்து வாழ்வதை சார்ந்ததாக இருக்க வேண்டும்.
இந்தியாவைப் போலவே பெரும்பாலான வளர்ந்து வரும் நாடுகளில் பருவநிலை மாறுபாட்டில் விவசாயம் பெரிய அளவில் பாதிக்கப்பட்டுள்ளது. பயிரிடும் முறைகளில் மாற்றம், காலம் தவறிய மழை மற்றும் வெள்ளம், புயல்களால் விவசாயம் பாதிக்கப்படுகிறது.
இந்தியாவில் பாரம்பரியமாக பல சமுதாயங்கள் இயற்கையுடன் இணைந்து வாழ்ந்து வந்துள்ளனர். அந்த பாரம்பரிய நடைமுறைகளை நாம் பின்பற்ற வேண்டும்.
இதன் அடிப்படையிலேயே அனைத்து வீடுகளுக்கும் குழாய் மூலம் குடிநீர், தூய்மை இந்தியா திட்டம், சமையல் காஸ் இணைப்பு திட்டங்கள் வகுக்கப்பட்டுள்ளன. இதன் மூலம் மக்களின் வாழ்க்கை தரமும் உயர்ந்துள்ளது.
நம் முன்னோர்கள் கடைப்பிடித்து வந்த, இயற்கையுடன் இணைந்து வாழும் நடைமுறையை இளைய சமுதாயத்துக்கு சேர்க்க வேண்டும். அவற்றை பள்ளிகளில் பாடத் திட்டமாக சேர்க்க வேண்டும்.
இயற்கையுடன் இணைந்து வாழ்வது உள்ளூர் அளவிலாக இருந்தாலும், அதை சர்வதேச அளவுக்கு இருக்க வேண்டும்.
* சூரியசக்திதான் நம்நாட்டின் முக்கிய பங்களிப்பு.
*2030 க்குள் கரியமில வாயுவை பூஜ்ய சதவீதமாக்க இலக்கு.
*நமது இலக்குகளை இந்தியா உறுதி செய்துள்ளது.

பருவநிலை உச்சி மாநாட்டிற்காக நான் முதல் முறையாக பாரிஸுக்கு வந்தபோது, உலகம் முழுவதும் உள்ள மற்ற வாக்குறுதிகளுடன் எனது சொந்த வாக்குறுதியைச் சேர்க்கும் எண்ணம் எனக்கு இல்லை. சர்வே சுகினா பவந்து என்ற செய்தியை வழங்கிய கலாச்சாரத்தின் பிரதிநிதியாக நான் மனிதநேயத்தின் மீது அக்கறை கொண்டு வந்தேன்.
எனவே என்னைப் பொறுத்தவரை, பாரிஸ் நிகழ்வு ஒரு உச்சிமாநாடு அல்ல, ஆனால் ஒரு உணர்வு, ஒரு அர்ப்பணிப்பு . இந்தியா உலகிற்கு வாக்குறுதிகளை அளிக்கவில்லை, அதற்கு பதிலாக, 125 கோடி இந்தியர்கள் தங்களுக்கு வாக்குறுதிகளை அளித்தனர். இந்தியா போன்ற வளரும் நாடு கோடிக்கணக்கான மக்களை வறுமையில் இருந்து மீட்டெடுக்கும் முயற்சியில் ஈடுபட்டுள்ளது எனக்கு மகிழ்ச்சி அளிக்கிறது.

பருவநிலை மாற்றத்தில் வாழ்க்கை முறை முக்கிய பங்கு வகிக்கிறது என்பதை உலகம் இன்று ஒப்புக்கொள்கிறது. உங்கள் அனைவருக்கும் ஒரு வார்த்தை இயக்கத்தை முன்மொழிகிறேன். இந்த வார்த்தை (லைப்) அதாவது சுற்றுச்சூழலுக்கான வாழ்க்கை முறை. இன்று, நாம் அனைவரும் ஒன்றிணைந்து வாழ்க்கையை ஒரு இயக்கமாக முன்னெடுத்துச் செல்வது அவசியம்.இவ்வாறு அவர் பேசினார்.
முன்னதாக, பிரிட்டன் பிரதமர் போரிஸ் ஜான்சனை சந்தித்து, இரு தரப்பு உறவுகள் குறித்து மோடி பேசினார்.

புதுடில்லி: இந்தியாவின் கோவாக்சின் தடுப்பூசி செலுத்தி கொண்டவர்கள், தங்கள் நாட்டுக்கு வருவதற்கு ஆஸ்திரேலிய அரசு அனுமதி அளித்துள்ளது.

கொரோனா பரவலில் இருந்து தற்காத்துக் கொள்ள அனைவரும் தடுப்பூசி செலுத்திக்கொள்ள மருத்துவ வல்லுநர்கள் அறிவுறுத்தி வருகின்றனர். அந்த வகையில் இந்தியாவில் தயாரிக்கப்பட்ட கோவாக்சின், கோவிஷீல்டு தடுப்பூசிகள் மக்களுக்கு செலுத்தப்பட்டு வருகிறது. இதில், கோவிஷீல்டுக்கு உலக சுகாதார அமைப்பு அனுமதி அளித்ததை தொடர்ந்து பல நாடுகளும் கோவிஷீல்டு தடுப்பூசி செலுத்தியவர்களை தங்கள் நாட்டுக்கு வருவதற்கு அனுமதி அளித்தது. ஆனால், பாரத் பயோடெக் நிறுவனம் தயாரித்த கோவாக்சின் தடுப்பூசியை உலக சுகாதார அமைப்பு உட்பட பல நாடுகள் இன்னும் அங்கீகரிக்கவில்லை.

அதற்கான அனுமதி வழங்கும்படி, பயோடெக் நிறுவனம் உலக சுகாதார அமைப்பிடம் கடந்த மே மாதம் விண்ணப்பித்திருந்தது. இது தொடர்பாக உலக சுகாதார அமைப்பின் தொழில்நுட்ப ஆலோசனைக்குழு தினம் ஆய்வு செய்தது. அங்கீகாரம் தொடர்பாக நவ.,3ம் தேதி இறுதி முடிவு எட்டப்படும் என தெரிவிக்கப்பட்டிருந்தது. இந்நிலையில் கோவாக்சின் தடுப்பூசி செலுத்தி கொண்டவர்கள், தங்கள் நாட்டுக்கு வருவதற்கு ஆஸ்திரேலியா அனுமதி அளித்துள்ளது. தடுப்பூசியின் பாதுகாப்பு மற்றும் தரம் ஆகியவற்றை ஆய்வு செய்தபிறகே ஆஸ்திரேலிய அரசு அனுமதி அளித்துள்ளதாக கூறப்படுகிறது.

பிரேசில்லா: பிரசிலி நாட்டின் முக்கிய வங்கிகள் செயல்படும் நகருக்குள் நுழைந்து கொள்ளை முயற்சியில் ஈடுபட்ட 25 கொள்ளையர்கள் சுட்டு கொல்லப்பட்டனர். பல மணி நேரம் நடந்த போராட்டத்தில் நேர்த்தியான துப்பாக்கி வகைகைள பயன்படுத்தினர் .

பிரேசில் மினாஸ் ஜெராயிஸ் நகரின் பிரதான சாலையில் வங்கி கிளைகள், ஏடிஎம் மையங்கள் உள்ளன. அங்கு பயங்கர ஆயுதங்களுடன் புகுந்த கொள்ளை கும்பல் வங்கிகளுக்குள் செல்ல முற்பட்டது.

தகவலறிந்த போலீசார் கொள்ளையர்கள் மீது துப்பாக்கிச் சூடு நடத்தினர். கொள்ளையர்களும் போலீசாரை நோக்கி துப்பாக்கியால் சுட்டனர். இதில் 25 கொள்ளையர்கள் பலியானதாக கூறப்படுகிறது.

இது போல் கடந்த ஆண்டு வங்கி கொள்ளையர்கள் ஆகஸ்ட் மற்றும் டிசம்பரில் வங்கி ஊழியர்களை பிணயை கைதிகளாக வைத்து கொள்ளை முயற்சி முறியடிக்கப்பட்டது.

ஜெனிவா: ‛‛டெல்டா வைரஸிலிருந்து பிரிந்து புதிதாக உருவெடுத்துள்ள ஏ.ஒய்.4.2 வைரஸ் பிரிட்டனில் 93 சதவீதம் கண்டறியப்பட்டுள்ளது,” என்று உலக சுகாதார அமைப்பு திடுக்கிடும் தகவலை வெளியிட்டுள்ளது.

இதுகுறித்து உலக சுகாதார அமைப்பு வெளியிட்ட அறிவிப்பில் தெரிவித்துள்ளதாவது: ஏ.ஒய்.4.2 வைரஸ் தொற்றின் வீரியம் குறித்து அறிய தொடர் ஆய்வு செய்யப்பட்டு வருகிறது. டெல்டா வைரஸிலிருந்து பிரிந்து புதிதாக உருவெடுத்துள்ள ஏ.ஒய்.4.2 வைரஸ் 42 நாடுகளில் கண்டெறியப்பட்டுள்ளது. இதில் 93 சதவீதம் தொற்று பிரிட்டனில் மட்டும் கண்டறியப்பட்டுள்ளது. டெல்டா வைரஸிலிருந்து பிரிந்து உருவான மற்ற 20 வைரஸ்கள் குறித்தும் ஆய்வு செய்து வருகிறோம். கடந்த வாரத்தில் 4 சதவீதம் கொரோனா தொற்று உலக அளவில் அதிகரித்துள்ளது. இவ்வாறு தெரிவிக்கப்பட்டுள்ளது.

பிரிட்டனில் ஏ.ஒய்.4.2 வைரஸ் கடந்த ஜூலை மாதம் முதன்முதலில் கண்டறியப்பட்டது. அதன்பின் படிப்படியாக பிரிட்டனில் அதிகரித்து, பல்வேறு நாடுகளுக்கும் பரவத் தொடங்கியுள்ளது. இதன் காரணமாக ஏ.ஒய்.4.2 வைரஸ் குறித்து பிரிட்டன் மருத்துவ வல்லுநர்கள் தீவிரமாக ஆய்வு செய்து வருகின்றனர்.

கராச்சி: பாகிஸ்தான் ராணுவ தளபதி கமர் ஜாவேத் பஜ்வா பதவி விலக வேண்டும் எனக்கூறி கடிதம் எழுதிய முன்னாள் மேஜனர் ஜெனரல் ஒருவரின் மகனுக்கு தேச துரோக வழக்கில் 5 ஆண்டு சிறை தண்டனை வழங்கி ராணுவ நீதிமன்றம் தீர்ப்பு வழங்கி உள்ளது.

பாகிஸ்தான் ராணுவ தளபதியாக உள்ள கமர் ஜாவேத் பாஜ்வாவிற்கு பதவி நீட்டிப்பு வழங்கப்பட்டது. இதற்கு எதிர்ப்பு தெரிவித்து, ராணுவத்தில் மேஜர் ஜெனரலாக பணிபுரிந்து ஓய்வு பெற்ற ஜாபர் அஸ்காரி என்பவரது மகன் ஹசன் அஸ்காரி, பாஜ்வாவிற்கு கடிதம் எழுதியிருந்தார். அதில், பதவி நீட்டிப்பு வழங்கியதை விமர்சித்தும், உடனடியாக ராஜினாமா செய்யும்படியும் தெரிவித்திருந்ததாக அந்நாட்டு மீடியாக்கள் தெரிவித்துள்ளன.

இதையடுத்து, அவர் மீது தேச துரோக வழக்குப்பதிவு செய்யப்பட்டது. ஹசன் கைது செய்யப்பட்டு சிறையில் அடைக்கப்பட்டார். சாமானியர் மீதான வழக்கை ராணுவ நீதிமன்றத்தில் நடத்த முடியுமா? என கேள்வி எழுந்தது. இது தொடர்பாக இஸ்லாமாபாத் உயர்நீதிமன்றத்திலும் விசாரணை நடந்தது.

இந்நிலையில், இந்த வழக்கை விசாரணையின் போது, நீதிமன்றத்தால் நியமனம் செய்யப்பட்ட நபர், ஹசனுக்கு ஆதரவாக வாதாடினார். இந்த வழக்கை விசாரித்த ராணுவ நீதிமன்றம், ஹசனுக்கு 5 ஆண்டு சிறை தண்டனை வழங்கி உத்தரவிட்டுள்ளது.