உலக செய்திகள்

புதுடில்லி: வெளிநாடுகளில் இருந்து வரும் 5 வயதுக்கு உட்பட்ட குழந்தைகளுக்கு கோவிட் பரிசோதனை தேவையில்லை என மத்திய அரசு தெரிவித்துள்ளது.

இந்தியாவில் கோவிட் பாதிப்புகள் படிப்படியாக குறைந்து வருகிறது. இந்நிலையில், வெளிநாடுகளில் இருந்து இந்தியா வரும் பயணிகளுக்கு மேற்கொள்ளப்படும் வழிகாட்டு நெறிமுறைகளில் சில மாற்றங்கள் செய்து, புதிய வழிகாட்டு நெறிமுறைகளை மத்திய சுகாதாரத்துறை வெளியிட்டுள்ளது.

அதில் தெரிவிக்கப்பட்டுள்ளதாவது: வெளிநாடுகளில் இருந்து வரும் பயணிகள் உலக சுகாதார அமைப்பு அங்கீகரித்த ஏதேனும் தடுப்பூசியை இரு தவணையும் செலுத்தி 15 நாட்கள் ஆகி இருக்க வேண்டும்.

அதேபோல், வெளிநாடுகளில் இருந்து வரும் 5 வயதுக்கு உட்பட்ட குழந்தைகளுக்கு வருகைக்கு முன்போ அல்லது வருகைக்கு பின்னரோ கோவிட் பரிசோதனை தேவையில்லை. அதேநேரத்தில், வருகைக்கு 14 நாட்களுக்கு உள்ளாக அவர்களுக்கு ஏதேனும் கோவிட் அறிகுறிகள் தென்பட்டாலும் அவர்களுக்கு கோவிட் பரிசோதனை மேற்கொள்ளப்படும். இது இன்று (நவ.,12) முதல் நடைமுறைக்கு வரும். இவ்வாறு அதில் தெரிவிக்கப்பட்டுள்ளது.

புது டில்லி: “இந்தியாவும் அமெரிக்காவும் இயல்பான கூட்டாளிகள், குறிப்பாக கல்வித் துறையில் ஒத்துழைப்பை வலுப்படுத்த மிகப்பெரிய சாத்தியக்கூறுகள் உள்ளது.” என மத்திய கல்வி அமைச்சர் தர்மேந்திர பிரதான் கூறினார்.

நியூயார்க், சிகாகோ, சான் பிரான்சிஸ்கோ உள்ளிட்ட அமெரிக்காவின் 5 நகரங்களில் உள்ள இந்திய துணைத் தூதரங்களுடன் இணைந்து இந்திய தூதரகம் கல்வி தொடர்பான வட்டமேசை கூட்டத்தை புதனன்று ஏற்பாடு செய்திருந்தது. ‘இந்திய – அமெரிக்க கல்வி உறவை மேம்படுத்துதல்’ என்ற தலைப்பில் காணொளி காட்சி வாயிலாக இக்கூட்டம் நடைப்பெற்றது. இந்தியா சார்பில் மத்திய கல்வி அமைச்சர் தர்மேந்திர பிரதான் பங்கேற்றார். அமெரிக்காவின் 20 முன்னணி பல்கலைக்கழகங்களின் வேந்தர்கள் பங்கேற்றனர்.
இக்கூட்டத்தில் அமைச்சர் பிரதான் பேசியதாவது: இந்தியாவும் அமெரிக்காவும் இயல்பான கூட்டாளிகள், குறிப்பாக கல்வித் துறையில். இந்திய மற்றும் அமெரிக்க கல்வி நிறுவனங்களுக்கு இடையே ஒத்துழைப்பை வலுப்படுத்த நிறைய வாய்ப்புகள் உள்ளன. தொழில்துறை, கல்வித்துறை மற்றும் கொள்கை வடிவமைப்பாளர்களை இணைப்பதில் பிரகாசமான வாய்ப்புகளை காண்கிறேன்.

இந்தியாவின் தேசிய கல்விக் கொள்கை 2020, மாணவர்கள் மற்றும் ஆசிரியர்களின் செயல்பாடுகளை உலகளவில் திறந்துவிட்டுள்ளது. இக்கொள்கை, ஆராய்ச்சி பங்களிப்பு மற்றும் பரஸ்பர நன்மை பயக்கும் கல்வி ஒத்துழைப்புகளை ஊக்குவிக்கிறது. இந்திய கல்வி முறை உலகளாவிய இலக்குகளுடன் இணைவதற்கான வாய்ப்பை புதிய கல்விக் கொள்கை அனுமதிக்கிறது. என கூறினார்.

கான்பரா: ஆஸ்திரேலியாவுக்கு அருகே பசிபிக் கடலில் அமைந்துள்ள தீவு நாடான துவாலுவின் வெளியுறவு அமைச்சர், தனது தாழ்வான நாடு காலநிலை மாற்றத்தால் மிகவும் பாதிக்கப்பட்டிருப்பதை உணர்த்தும் விதமாக, ஐ.நா., காலநிலை மாநாட்டிற்காக கடல் நீரில் முழங்கால் ஆழத்தில் நின்று உரையாற்றினார். அப்படங்கள் டிரெண்டாகியுள்ளன.

ஸ்காட்லாந்தின் கிளாஸ்கோவில் ஐ.நா.,வின் 26-வது பருவநிலை மாநாடு அக்டோபர் 31 தொடங்கி நவ., 12 வரை நடக்கிறது. இந்தியா சார்பில் இம்மாநாட்டில் மோடி பங்கேற்று உரையாற்றினார். அப்போது 2070-ல் இந்தியா பூஜ்ய கார்பன் உமிழ்வு இலக்கை அடையும் என்று பிரதமர் மோடி அறிவித்தார். ஐ.பி.சி.சி., எனப்படும் காலநிலை மாற்றம் பற்றிய நாடுகளுக்கிடையேயான குழு, காலநிலை தாக்கம் பற்றிய அறிக்கையை சமர்பித்தது. மனிதர்களின் நடவடிக்கையால் புவியின் வெப்பநிலை உயர்ந்து வருவதாக குற்றம்சாட்டியது.

இந்நிலையில் இம்மாநாட்டிற்காக தீவு நாடான துவாலுவின் வெளியுறவு அமைச்சர் வீடியோ உரையை பதிவு செய்துள்ளார். அது அந்நாட்டின் தலைநகர் புனாபுட்டியின் கடைசியிலிருக்கும் போங்காபேலி தீவில் எடுக்கப்பட்டுள்ளது. கோட் சூட் அணிந்து கொண்டு அமைச்சர் முழங்கால் அளவு கடல் நீரில் நின்று பேசுகிறார். இது பலரது கவனத்தை கவர்ந்துள்ளது.

அந்த உரையில் அமைச்சர் சைமன் கூறியதாவது: காலநிலை மாற்றம் மற்றும் கடல் மட்ட உயர்வின் தாக்கங்கள் காரணமாக துவாலுவில் நாங்கள் எதிர்கொள்ளும் நிஜ வாழ்க்கை சூழலுடன் இது இணைக்கிறது. மேலும் இந்த அறிக்கை, காலநிலை மாற்றம் காரணமாக மனிதர்கள் இடம்பெயரும் பிரச்னையை தீர்க்க துவாலு எடுக்கும் துணிச்சலான நடவடிக்கையை எடுத்துக்காட்டுகிறது. தாழ்வான நாடுகளில் உயிர்வாழ்வது ஆபத்தில் உள்ளது. அதற்காக உடனடியாக நடவடிக்கை எடுக்க வேண்டும். என்றார்.

லண்டன்: ராணி இரண்டாம் எலிசபெத்தின்(95) ஓய்வைத் தொடர்ந்து அரசு நிர்வாக பொறுப்புகளை ஏற்கும் இளவரசர் சார்லஸின் மனைவி கேமில்லா பிரிட்டன் மக்கள் மத்தியில் பிரபலமடைந்து வருகிறார்.

பிரிட்டன் அரச குடும்பத்தின் மூத்த உறுப்பினரான ராணி இரண்டாம் எலிசபெத் தற்போது 95 வயதை எட்டியுள்ளதால் வயோதிகம் காரணமாக ஓய்வெடுக்க முடிவெடுத்துள்ளார். இதனால் பல பொறுப்புகளிலிருந்து அவர் விடுவிக்கப்பட்டுள்ளார்.
ராணி இரண்டாம் எலிசபெத் செய்து வந்த அரசு பணிகளை தற்போது அவரது மகனான இளவரசர் சார்லஸ் மேற்கொண்டு வருகிறார். சார்லஸுக்கு மறைந்த இளவரசி டயானாவுடன் பிறந்த மகன் இளவரசர் வில்லியம். சார்லஸின் இரண்டாவது மனைவி கேமில்லாமீது தற்போது பிரிட்டன் ஊடகங்களது வெளிச்சம் அதிகமாகப் படுகிறது.
டயானாவின் மரணத்திற்குப் பிறகு கடந்த 2005ஆம் ஆண்டு இளவரசர் சார்லஸ் கேமில்லாவை இரண்டாவதாக மணமுடித்தார். கடந்த 16 ஆண்டுகளாக பக்கிங்ஹாம் அரச குடும்பத்துடன் தொடர்புடைய கேமில்லாமீது பலவித விமர்சனங்களும் எழுந்தன. மக்களின் மனதைக் கவர்ந்த டயானாவின் இடத்தை அவர் பிடித்ததால் அரச குடும்ப ரசிகர்கள் அவரை வெறுக்கும் சூழ்நிலை உருவாகியது.
தற்போது 73 வயதாகும் கேமில்லா, ராணி இரண்டாம் எலிசபெத்தின் கணவர் இளவரசர் பிலிப்-ன் சமீபத்திய மரணத்தை அடுத்து பல முக்கிய நிகழ்வுகள் மற்றும் கூட்டங்களில் கலந்து கொள்ளும் நிலைக்கு தள்ளப்பட்டுள்ளார். சமீபத்தில் பருவநிலை மாற்றத்தை தடுக்க ஸ்காட்லாந்தின் கிளாஸ்கோ நகரில் நடந்த சர்வதேச கூட்டத்தில் கணவர் சார்லஸ் உடன் கேமில்லா கலந்து கொண்டார்.
எடின்பர்க் நகரில் ஸ்காட்லாந்து நாடாளுமன்ற திறப்புவிழாவில் கேமில்லா முக்கிய பங்கு வகித்தார். இவ்வாறாக தற்போது கேமில்லாமீது அதிக ஊடக வெளிச்சம் பாய்ந்து வருகிறது. கடந்த ஆண்டுமுதல் பிரிட்டனில் கொரோனா தாக்கம் அதிகரித்ததைத் தொடர்ந்து தடுப்பு பணிகளிலும் கேமில்லா மும்முரமாக ஈடுபட்டு இருப்பது குறிப்பிடத்தக்கது.

விரைவில் சார்லஸ், கேமில்லா ஆகிய இருவரும் எகிப்துக்கு முதன்முறையாக அரசுமுறைப் பயணம் மேற்கொள்ள உள்ளனர். வனவிலங்கு பாதுகாப்புமுதல் கல்வியின் முக்கியத்துவத்தை மக்களிடம் கொண்டு சேர்ப்பதுவரை கேமில்லா தனது இன்ஸ்டா பக்கம் மூலமாக பல முன்னெடுப்புக்களை மேற்கொண்டு வருகிறார்.
இதுதவிர பல்வேறு பிரிட்டன் தொலைக்காட்சி மற்றும் ரேடியோ நிகழ்ச்சிகளில் கேமில்லா பேட்டி அளித்துள்ளார். இதனால் தற்போது பிரிட்டன் மக்களின் மத்தியில் அவரது புகழ் அதிகரித்து வருகிறது. மேலும் ராணி இரண்டாம் எலிசபெத் ஓய்வு பெற்றதன் காரணமாக அரச குடும்பத்தில் கேமில்லாவின் பங்கு இனி மிக முக்கியமானதாக அமையும் என்று கூறப்படுகிறது.

ஹூஸ்டன்: அமெரிக்காவின் ஹூஸ்டன் நகரில் நடந்த இசை திருவிழாவில் கூட்ட நெரிசலில் சிக்கி 8 பேர் பலியானார்கள். பலர் காயமடைந்துள்ளனர்.

ஹூஸ்டன் நகரில் ராப் பாடகர் டிராவிஸ் ஸ்கவுட் பங்கேற்ற நிகழ்ச்சி நடந்தது. இதில் 50 ஆயிரத்திற்கும் மேற்பட்டவர்கள் கலந்து கொண்டனர். அந்நாட்டு நேரப்படி வெள்ளிக்கிழமை இரவு 9 மணியளவில், நிகழ்ச்சி நடந்து கொண்டிருக்கும் போது, ரசிகர்கள் திடீரென மேடையை நோக்கி முண்டியடித்து சென்றனர். இதில், ஏற்பட்ட கூட்ட நெரிசலில் சிக்கி 8 பேர் உயிரிழந்தனர். பலர் காயமடைந்துள்ளனர். இதையடுத்து இசை நிகழ்ச்சி பாதியில் ரத்து செய்யப்பட்டது.

தகவல் அறிந்து வந்த தீயணைப்பு வீரர்கள் மீட்பு பணியில் ஈடுபட்டனர். அவர்கள் 17 க்கும் மேற்பட்டவர்களை உடனடியாக மருத்துவமனைக்கு அழைத்துச் சென்றனர். அதில், 11 பேருக்கு மாரடைப்பு ஏற்பட்டதாக அதிகாரிகள் தெரிவித்தனர். நிகழ்ச்சி நடந்த மைதானம் அருகே தற்காலிக மருத்துவமனைக்கு ஏற்பாடு செய்யப்பட்டு காயமடைந்தவர்களுக்கு சிகிச்சை அளிக்கப்பட்டது.

மாஸ்கோ: ரஷ்யாவில் கடந்த 24 மணி நேரத்தில் கொரோனா வைரஸ் தொற்றால் 1,191 பேர் உயிரிழந்துள்ளனர். இதனால் மக்கள் அச்சத்தில் உள்ளனர்.

உலக அளவில் கொரோனா வைரஸ் தொற்று பாதிப்பில் முதலிடத்தில் அமெரிக்காவும், இரண்டாம் இடத்தில் இந்தியாவும், மூன்றாவது இடத்தில் பிரேசிலும் உள்ளன. கொரோனாவால் அதிகம் பாதிக்கப்பட்ட நாடுகளின் வரிசையில் ரஷ்யா 5வது இடத்தில் உள்ளது.

ரஷ்யாவில் கடந்த சில வாரங்களாக கொரோனா வைரஸ் தொற்றின் தாக்கம் அதிகரித்து வருகிறது. கடந்த 24 மணி நேரத்தில் புதிதாக 40 ஆயிரத்து, 735 பேருக்கு கொரோனா வைரஸ் தொற்று உறுதி செய்யப்பட்டுள்ளது. இதன்மூலம் ரஷ்யாவில் வைரஸ் தொற்றால் பாதிக்கப்பட்டோர் எண்ணிக்கை 87 லட்சத்தை எட்டியது.
ஒரே நாளில் கொரோனா வைரஸ் தொற்றுக்கு 1,191 பேர் உயிரிழந்ததால், அங்கு பலியானோர் எண்ணிக்கை 2.44 லட்சத்தைக் கடந்துள்ளது. கொரோனா தொற்றில் இருந்து 75 லட்சத்துக்கும் அதிகமானோர் சிகிச்சை பெற்று குணமடைந்து வீடு திரும்பியுள்ளனர். தற்போது 9.64 லட்சத்துக்கும் மேற்பட்டோர் மருத்துவமனைகளில் சிகிச்சை பெற்று வருகின்றனர் என்று ரஷ்ய சுகாதாரத்துறை தெரிவித்துள்ளது.

புதுடில்லி: அமெரிக்காவில் 18 வயதுக்கு கீழ் உள்ள சிறுவர்களுக்கு அவசர காலத்தில் கோவேக்சின் தடுப்பூசி போடுவதற்கான அனுமதியை அந்நாட்டின் உணவு மருந்து கட்டுப்பாட்டு அமைப்பிடம் கோரியுள்ளதாக, பாரத் பயோடெக் நிறுவனத்தின் அமெரிக்க கூட்டாளியான ஓகுஜென் கூறியுள்ளது.

இந்தியாவை சேர்ந்த பாரத் பயோடெக் நிறுவனம் கோவேக்சின் என்ற தடுப்பூசியை உருவாக்கி உள்ளது. இந்த தடுப்பூசி இந்தியாவில் போடப்பட்டு வரும் நிலையில், அதனை அவசர காலத்தில் பயன்படுத்தி கொள்வதற்கான அனுமதியை உலக சுகாதார அமைப்பு சமீபத்தில் வழங்கியது. இந்த நிறுவனம், அமெரிக்காவை சேர்ந்த ஒகுஜென் நிறுவனத்துடன் இணைந்து செயல்பட்டு வருகிறது.

இந்நிலையில் 18 வயது வரை உள்ள சிறுவர்களுக்கு கோவேக்சின் தடுப்பூசியை அவசரகாலத்தில் பயன்படுத்தி கொள்வதற்கு அமெரிக்க உணவு மற்றும் மருந்து தரக்கட்டுப்பாட்டு அமைப்பிடம் ஒகுஜென் நிறுவனம் வாயிலாக அனுமதி கேட்கப்பட்டுள்ளதாக பாரத் பயோடெக் நிறுவனம் வெளியிட்ட அறிக்கையில் கூறப்பட்டுள்ளது.

சியோல்: ஐ.நா.,பாதுகாப்பு கவுன்சில் விதித்துள்ள பொருளாதார தடை மற்றும் கொரோனாவால் எல்லைகள் மூடப்பட்டதால் உணவுப்பொருட்கள் கொண்டு வருவதில் சிக்கல் போன்றவற்றால் வடகொரியாவில் உணவுப்பொருட்களுக்கு கடும் தட்டுப்பாடு ஏற்பட்டுள்ளது.

உலக நாடுகளின் கடும் எதிர்ப்பையும், ஐ.நா., பாதுகாப்பு கவுன்சில் தீர்மானங்களையும் கண்டுகொள்ளாமல் 2006ம் ஆண்டு முதல் வடகொரியா அணுகுண்டுகளை சோதித்து வருகிறது. அத்துடன் கண்டம் விட்டு கண்டம் பாயும் ஏவுகணைகளையும் பரிசோதிக்கிறது. இதன் காரணமாக வடகொரியா மீது ஐ.நா. பாதுகாப்பு கவுன்சில் கடுமையான பொருளாதார தடைகளை விதித்துள்ளது. இதனால் அங்கு கடுமையான பொருளாதார நெருக்கடி நிலவுகிறது.

இதற்கு மத்தியில் கொரோனா வைரஸ் பெருந்தொற்றால் எல்லைகள் மூடப்பட்டுள்ளன. உணவுப்பொருட்கள் கொண்டு வருவது முடங்கியுள்ளது. இதனால் உணவுப்பொருட்களுக்கு கடும் தட்டுப்பாடு நிலவுகிறது.

இந்நிலையில் பொதுமக்கள் குறைவாக சாப்பிட வேண்டும் என்று கிம் ஜாங் உன் சமீபத்தில் தெரிவித்தது, மக்கள் மத்தியில் மிகுந்த வேதனையை ஏற்படுத்தியது. குளிர்காலம் வருகிற நிலையில் இப்போதே மக்கள் பட்டினி கிடப்பதாகவும், பட்டினிச்சாவுகள் நேரிடுவதாகவும் தகவல்கள் வெளியாகி உள்ளன.

தெருக்களில் அனாதை குழந்தைகள் நடமாட்டம் அதிகரித்துள்ளது. பட்டினியால் இறப்பது போன்ற பிரச்சினைகள், அடித்தட்டு மக்களுக்கு உணவு பொருட்கள் பற்றாக்குறை எதிர்பார்த்ததை விட மோசமாக உள்ளது என்று தகவல்கள் வெளியாகி உள்ளன.

வட கொரிய மக்கள் வரக்கூடிய வேளாண்அறுவடையை நம்பிக்கையுடன் எதிர்நோக்கி உள்ளனர். அறுவடை மூலம் கிடைக்கிற ஒவ்வொரு அரிசியையும் சோளத்தையும் பத்திரமாக சேகரிக்குமாறு வடகொரிய தலைவர் கிம் ஜாங் உன் உத்தரவிட்டுள்ளார். இதற்காக பல்லாயிரக்கணக்கான மக்கள் வயல்களுக்கு அனுப்பப்படுகின்றனர். அறுவடையின்போது திருட்டு போனாலோ, ஏமாற்றினாலோ கடுமையான தண்டனை விதிக்கப்படும் என்றும் எச்சரிக்கப்பட்டுள்ளது.

டென்வர்: அமெரிக்காவில் உள்ள டென்வர் உயிரியல் பூங்காவில் அதிக எதிர்ப்பு சக்தியுடன் வாழக்கூடிய இரு கழுதைப்புலிகளுக்கு கொரோனா தொற்று இருப்பது உறுதி செய்யப்பட்டுள்ளது.

உலகிலேயே கழுதைப்புலியும் கொரோனாவில் பாதிக்கப்பட்டிருப்பது இதுதான் முதல்முறை. இதற்கு முன், சிங்கங்கள், புலிகள் பாதிக்கப்பட்ட நிலையில் தற்போது கழுதைப்புலியும் பாதி்க்கப்பட்டுள்ளது.

உயிரியல் பூங்காவில் உள்ள 22 வயதான கோஸி, 23 வயதான கிபோ ஆகிய இரு கழுதைப்புலிகளுக்கும் கொரோனா தொற்று இருப்பது உறுதி செய்யப்பட்டது. இரு கழுதைப்புலிகளுக்கும் அடிக்கடி இருமல், மூக்கில் சளிவருதல், சோர்வாக இருத்தல் போன்ற அறிகுறிகள் காணப்படுகின்றன.

டென்வர் உயிரியியல் பூங்காவில் உள்ள சிங்கங்கள், புலிகளுக்கு முதலில் கொரோனா தொற்று ஏற்பட்டதையடுத்து, அதன்பின் மற்றவிலங்களுக்கும் கொரோனா பரிசோதனை செய்ததில் கழுதைபப்புலியும் பாதிக்கப்பட்டது தெரியவந்தது என்று தேசிய கால்நடை சேவை ஆய்வகம் தெரிவித்துள்ளது.

கழுதைப்புலிகள் உடலிலிருந்து எடுக்கப்பட்ட மாதிரிகள் அனைத்தும் கொலராடோ பல்கலைக்கழக ஆய்வகத்தில் பரிசோதிக்கப்பட்டு கொரோனா இருப்பது உறுதி செய்யப்படன. இதுவரை டென்வர் உயிரியில் பூங்காவில் 2 கழுதைப்புலிகள், 11 சிங்கங்கள், 2 புலிகளுக்கு கொரோனா தொற்று இருப்பது உறுதி செய்யப்பட்டுள்ளது.

இது குறித்து டென்வர் வனஉயிரியல் பூங்கா நிர்வாகம் தெரிவித்ததாவது: கழுதைப்புலிகளுக்கு கொரோனா தொற்று ஏற்பட்டிருப்பது கடினமானது. அதிகமான நோய் எதிர்ப்புச் சக்தி கொண்டவை கழுதைப்புலிகள், ஆந்த்ராக்ஸ், ரேபிஸ், போன்ற பல்வேறு கொடிய வைரஸ்களையும் தாங்கி உயிர்வாழக் கூடியவை கழுதைப்புலிகள். அவைகளுக்கு கொரோனா தொற்று ஏற்பட்டிருப்பது அதிர்ச்சி அடைய வைத்துள்ளது. மற்ற கழுதைப்புலிகள் ஆரோக்கியமாக இருக்கின்றன. இவ்வாறு தெரிவித்துள்ளது.