Home / அரசியல் / டெல்லியில் யாரை சந்தித்தார் தினகரன்?

டெல்லியில் யாரை சந்தித்தார் தினகரன்?

டிடிவி தினகரன் நேற்று தீடீர் பயணமாக டெல்லி சென்று திரும்பியது தமிழக அரசியல் களத்தில் விவாதத்தை ஏற்படுத்தியுள்ளது

தர்மயுத்தம் நடத்திய ஓ.பன்னீர் செல்வம் அதிமுகவுக்கு எதிராக அரசியல் செய்து வந்த நிலையில் பின்னர் ஒபிஎஸ், இபிஎஸ் இணைப்பு நடைபெற்றது. ஆளுநரே இருவரின் கையைப் பிடித்து இணைத்து வைத்தது சர்ச்சையைக் கிளப்பியது. இந்நிலையில் டிடிவி தினகரன் கட்சியிலிருந்து நீக்கப்பட்ட நிலையில் அவர் அமமுகவை தொடங்கினார்.

மத்திய, மாநில அரசுகளை கடுமையாக எதிர்த்த தினகரன் ஆர்.கே.நகர் இடைத்தேர்தலில் வெற்றி பெற்றார். மக்களவைத் தேர்தல், மினி சட்டமன்ற தேர்தல் ஆகியவற்றில் வெற்றி பெறாவிட்டாலும் செல்லும் இடங்களெல்லாம் மக்கள் கூட்டம் அதிகமாக கூடியது.

தொடர்ந்து மத்திய மாநில அரசுகளை எதிர்த்துவந்த அவர் தேர்தல் நெருங்கும் இந்த சமயத்தில் வெளியே தலைகாட்டாமல் இருப்பது பல்வேறு யூகங்களுக்கு வழிவகுத்தது. கொரோனா பொது முடக்கத்தால் முன்பு போல் பரபரப்பாக இயங்கவில்லை என்று காரணம் கூறப்பட்டாலும், கட்சி நிர்வாகிகளை ஆன்லைன் மூலமாகக் கூட சந்திக்கவில்லை என்று கூறப்படுகிறது.

அதிமுகவில் யார் முதல்வர் வேட்பாளர் என்ற கருத்து மோதல் தீவிரமடைந்துள்ள நிலையில் தினகரன் அதை தனக்கு சாதகமாக பயன்படுத்தி அரசியல் செய்வார் என எதிர்பார்த்த நிலையில் விழுப்புரம் மாவட்டம் பண்ணை வீட்டில் ஓய்வில் இருக்கிறார். புதிய கல்விக் கொள்கை, வேளாண் சட்ட மசோதா ஆகியவற்றில் நாடு முழுவதும் மத்திய அரசுக்கு எதிர்ப்பு கிளம்பியுள்ள போதும் தினகரன் அமைதியாக இருப்பது பல்வேறு சந்தேகங்களை எழுப்புவதாக அரசியல் விமர்சகர்கள் கூறுகின்றனர்.

இந்நிலையில் நேற்று தனி விமானம் மூலம் டெல்லி சென்று இரவு சென்னை திரும்பினார். கொரோனா பொது முடக்க காலத்தில் தனி விமானத்தில் செல்ல மத்திய அரசின் அனுமதி வேண்டும் என சொல்லப்படும் நிலையில் தினகரன் சென்று வந்தது எப்படி என கேள்வி எழுப்புகின்றனர். இந்த பயணம் பற்றிய தகவல் தினகரனுக்கு நெருக்கமான அமமுகவின் சீனியர் தலைவர்களுக்கும் சொல்லப்படவில்லை என கூறப்படுகிறது.

சசிகலா விடுதலை ஜனவரி 27 ஆம் தேதி என சிறைத் துறை நிர்வாகம் தகவல் அறியும் உரிமை சட்டத்தின் மூலம் தெரிவித்திருந்தாலும் அபராதம் கட்டுதல், சலுகை நாள்கள் உள்ளிட்டவற்றை காரணம்காட்டி விரைவில் வெளியே கொண்டுவர முயற்சிகள் நடைபெற்று வருகிறது. அத்துடன் வருமான வரித்துறையால் சசிகலாவின் சொத்துகள் முடக்கப்பட்டுள்ள நிலையில் பாஜக பக்கம் தினகரன், சசிகலா தரப்பு சாய்கிறதா என்ற கேள்விகள் அரசியல் விமர்சகர்களால் முன்வைக்கப்படுகிறது.

நேற்றையை டெல்லி பயணத்தில் தினகரன் பாஜக தலைவர்களை சந்தித்திருக்க வாய்ப்புள்ளதாக செய்திகள் வெளியாகிவருகின்றன.

 

Thanks to : samaiyam

Leave a Reply

Your email address will not be published. Required fields are marked *